US soldiers ‘killed Afghan civilians for sport and collected fingers as trophies

E përditshmja The Guardian shkruan se 5 prej ushtareve kishin krijuar “si lojë” një skuadër dhe vrisnin civilë duke mbledhur më pas gishtrinjtë e tyre si trofe. Ata akuzohen për vrasje ndërsa 7 ushtarët e tjerë do të përballen me akuzat për fshehje të krimit.

Sipas “The Guardian” akuzat e ngritura janë më të rëndat mes atyre për krime lufte të kryera në Afganistan.

Hetuesit thonë se djemtë akuzohen për vrasjen e 3 burrave afganë ndërsa kanë zbardhur edhe skenaret e krimeve. Civilët dyshohet të jenë vrarë në fshatin Muhamed Kalay në muajin janar teksa “grupi vrarës” patrullonte në këtë zonë. Hetuesit thonë se ushtarët i qëllonin viktimat me granata ose me armë dhe më pas fshihnin gjurmët dhe mblidhnin gishtrinjtë e tyre si suvenire.

Pesë ushtarët, Calvin Gibbs, Jeremy Morlock, Andrew Holmes, Michael Wagnon dhe Adam Winfield akuzohen për vrasje ndërsa të gjithë kanë mohuar akuzat.
Ata rrezikojnë dënimin me vdekje apo burgim të përjetshëm, nëse shpallen fajtorë.

Vrasjet dolën në dritë në muajin maj kur Ushtria filloi të hetojë një sulm ndaj një ushtari i cili u kishte treguar epërorëve se anëtarët e njësisë së tij konsumonin hashash. Dy ditë pas raportimit të tij tek epërorët, ushtari u rrah barbarisht dhe u kërcënua të mbante gojën të mbyllur nga ushtarët e togës ku ai bënte pjesë. Pas kësaj ushtari vendosi të tregonte gjithcka dinte edhe për “ekipin vrasës”.
(e.n/BalkanWeb)